عطاشا .. ياحنا ( للشاعر مدحت عطية )

عطاشا .. ياحنا
والنيل .. جارنا
غربا
والدار .. دارنا

عطاشا
مع أن السواقى .. بتدور
عطاشا
رغم .. كل البحور

عطاشا .. والميه
ماعدتش تروينا
ما عدش الخلا ... يسعنا
ما عدش العمر .. يكفينا

بنجرى .. ونخطى
وندوس في الطين
بنحبى .. ونوطى
لكن جايين

أيوه جايين
مهما طال المطال
بعد الليل .. نهار
بعد ما نتوه .. هنرجع
بعد الطل .. دار

عطاشا
بس هنجيب ..الميى
هنزرع في العتمه .. نور
هنسرق من الشمس .. الضى
هنقول بكرة لينا
هنقول .. زمانا جاى

من ديوان ( أنا كلمة ) للشاعر مدحت عطية