الزمن ما يهزم الرجل والدنيا نصيب . ......!!!!!!!

بسم الله الرحمن الرحيم
السلام عليكم ورحمة الله وبركاته




الزمن ما يهزم الرجل والدنيا نصيب . والثمينه غاليه والليالي تجربه

والوفا ضد الغدر والصحيب مع الصحيب . ومن يصارع بيض الايام لازم تنكبه

الكابه والحزن ما يعالجها طبيب . والسعاده لو هي بعير بكره نشعبه

شاعرن جرحه من الوقت والدنيا عطيب . حاول انه ينهب الوقت والوقت انهبه

والمذله والمهونه على الرجال عيب . والخطا مافيه رجال عاقل يرغبه

والكلااام الزين يخلص طليبن من طليب . والرجل يبقى طموحه معلق بشنبه

قادني للعشق دربن على العاذل صعيب . وحثني لشوق درسن عجزت استوعبه

واحدن في نظرته تبدي الشمس وتغيب . حد قلبي يم قلبه وساقه واغصبه

يسلب اعيون المخاليق بالرمش الغريب . ويفتن العالم بعقله وزينه وادبه

رمش عينه يطرد الخووف والليل الكئيب . وكثر صمته يستفز الكلااام ويغلبه

من عيونه يفرض السلم بعيوون الحريب . موهبه من مالك الملك واحلى موهبه

يجذب اللي ما دخل فيه لاشكن وريب . يجذبه وشلون مدري ولكن يجذبه !

ان طلبته ما بخل وان مسك جرحي يطيب . وان طلبني لو يبا النجم لبيت اطلبه

وان بدى لناس غنت طيور العندليب . وان تخفاا واختفا تنشد النااس اعربه

يا حبيبي شاعرك طاح قدامك صويب . اه من سهمن تعلق بصدره واعطبه

كان يحلم بالسعاده وحلمه مايصيب . لين صار الحلم كذبه ونارك تلهبه

اسمك ابقلبي بنا عرش حب وعهد طيب . يا عساي الموت كاني تجرات اشطبه

انت زينك صبحن ابيض ونورن مايغيب . الله اللي سجل الزين بسمك واكتبه

الخجل كنه نهب كبريا صمتك نهيب . والبراءه كنها ضيف وانت امعزبه

انت مثل السيل لاسال مع بطن الشعيب . من يمره مانتبه غصب عنه ينتبه

ايه احبك واعترف للبعيد وللقريب . ايه والدنيا بدونك بعيني مرعبه

اقتنعت ان الزمن جرح والدنيا نصيب . والثمينه غاليه والليالي تجربه



أعجبتني ونقلتها لعلها تليق بذائقتكم الشعريه

وسلامتكم